يعني ايه NFT

July 20, 2022July 21, 2022 Tamer Salah 1293 Views 0 Comment NFT

مؤخراً بدأنا نسمع المصطلح ده كتير NFT و يكفي اني أقولك ان نمو سوق ال NFTs في آخر 5 سنين وصل ل 700% بحجم سوق أكثر من 10 مليار دولار في 2021 و متوقع ليه نمو أكثر في السنوات القادمة .

كثير مننا عارف ان ال NFTs مرتبطة بالعملات الرقمية المشفرة، بس مش واضح بالظبط هي عبارة عن ايه ؟

النهاردة هحاول أوضح الموضوع بأبسط طريقة ممكنة.

معنى NFT

NFT = Non Fungible Token
الرموز الغير قابلة للإستبدال

ممكن نعتبرها شكل من أشكال العملة الرقمية اللي ليها قيمة معينة و لكن فيه فرق جوهري بينها و بين أي عملة رقمية و هي انها Non Fungible – يعني ايه ؟

أول حاجة لازم نعرف يعني ايه Fungible – قابلة للإستبدال

دي خاصية موجودة في النقود العادية، لو معاك ورقة ب 20 دولار تقدر تستبدلها من أي حد بورقتين كل واحدة ب10 دولار و تبقى نفس القيمة بالظبط، و كمان تقدر تستبدلها ب 400 جنيه مصري تقريباً و يبقوا نفس القيمة بدون خلاف، نفس الفكرة في سبائك الذهب برضه.

ال NFT مش كدة، ال NFT هي أصول غير قابلة للإستبدال يعني ليها قيمة بس قيمة مميزة و مختلفة يعني ال NFT اللي بيمتلكه تامر قيمته غير ال NFT اللي بيمتلكه رامي غير اللي بتمتلكه مروة ، كل واحد بيقيّم ال NFT الخاص بيه بقيمة مختلفة و مانقدرش نبدل مابينهم كأنهم نفس الحاجة بالظبط، زي مثلاً القطع و اللوحات الفنية هي كلها قطع فنيه بس كل قطعة مميزة و مختلفة عن الأخرى في القيمة

يعني ال NFT مش عملة رقمية بالمعنى التقليدي ( رغم اعتمادها على نفس التقنية كما سنرى لاحقاً) هو أقرب لكونه Digital Asset – أصول رقمية لها قيمة محددة و بتختلف القيمة حسب الطلب عليها.
و أشهر شكل ليها حالياً هي الصور الرقمية.

يعني معظم الوقت حضرتك فعلياً في الأساس بتشتري صورة رقمية مش أكثر …طيب ايه الجديد في كدة و ليه ساعات بنشوف أسعار خيالية لصور عادية.

الاختلاف ما بين ال NFT و أي صورة رقمية عادية هو حاجة أساسية ان ال NFT بيكون ليه مالك محدد مسجل في بيانات الNFT و أي عملية بيع لأي مالك آخر بيتم تسجيلها أيضا و الأهم ان ده بيتم بكل دقة و بتقنية ال Blockchain (نفس تقنية العملات المشفرة ) اللي يستحيل أو يصعب جدا جدا – إلى الآن -التلاعب بها

طيب ما أنا نفس ال NFT اللي فيه حد بيشتريه ب 2000 دولار مثلا أنا أقدر أعمل منه نسخة بكل سهولة و ببلاش .

دي حقيقة فعلاً بس في النهاية اللي اشتراه هو المالك الرسمي ليه و هو الوحيد اللي يقدر يبيعه يعني هو معاه الأصل و الباقي كله نسخ.
عشان تفهم الموضوع أكثر زي كدة لما حد بيشتري لوحة لفنان معروف أي حد بيقدر يعمل منها نسخة عادي لكن اللوحة الاصلية مع شخص واحد فقط و هي اللي ليها قيمة حقيقية و يقدر يبيعها.

هتقولي أيوة ده عشان فنان معروف فبيبيع اللوحة بأرقام كبيرة لكن الNFT أي حد ممكن يعمله .
كلامك صح و دي ميزة ال NFT انه أتاح لأي فنان عايز يكسب من شغله و يحميه من النسخ انه يعرض شغله ك NFT بس خلي بالك برضه إن مش كل ال NFTs بتتباع غالية أو بتتباع أصلاً.

و هنا هنتكلم بسرعة عن موضوع القيمة – value

ايه اللي بيحدد قيمة شيء معين ؟ الموضوع بيكون فيه اختلاف كبير من شخص لآخر و من مجموعة لأخرى و لكن المتفق عليه ان الشئ بتتحدد قيمته بناء على بعض الخصائص مثل :
ندرته scarcity – فائدته usefulness – الشعور الناتج عن شراؤه feelings

و زي ما قولنا الموضوع جدلي بشكل كبير لكن في النهاية بيحصل توافق من مجموعة من الناس على قيمة أنواع معينة من من الأصول Asset class و بالتالي بيكون ليها متوسط أسعار معين و ليها سوق و عرض و طلب و بالتالي ممكن نعتبر شراء النوع ده من الأصول استثمار كمان.

يعني كمثال فيه ناس بتشتري لوحات فنية بملايين الدولارات عشان بتحب الفن و أحيانا كاستثمار ثمنه بيزيد مع الوقت، مثلا تم بيع كارت بيسبول ورقي ممضي من أحد اللاعبين القدامى ب 3 مليون دولار.

السوق الخاص بالمقتنيات و القطع الفنية سوق مغري جداً و بيتم ضخ أموال طائلة فيه، و كان فيه محاولات كثير لتطبيق نفس الفكرة على المقتنيات الرقمية زي الصورر و اللوحات الديجيتال لكن كانت كلها بتفشل بسبب مشكلتين أولهم سهولة النسخ duplication و الثانية إمكانية البيع المتكرر لنفس الأصل Double selling

و المشكلتين دول تم حلهم تماما في ال NFT باستخدام تقنية ال Blockchain زي ما ذكرنا

هل ال NFT كلها صور رقمية فقط ؟

لأ ده الشكل الأكثر شيوعاً ليها، لكن تطبيقات الNFT أكثر بكتير سواء لو أشكال أخرى للأصول الرقمية زي التغريدات مثلا Tweets – مؤسس تويتر باع أول تغريدة ليه على تويتر في شكل NFT بسعر 3 مليون دولار و هنا ال NFT بتبقى أقرب لإنك بتشتري نسخة موقعة من شخص مشهور زي انك تخليه يوقع على تي شيرت أو كورة قدم بس هنا بيوقع على التغريدة بتاعته و بيخليها ملكك و تقدر تبيعها للمهتمين باقتناء الأشياء المميزة أو المختلفة.

و أيضا ممكن استخدام ال NFT كضمان لملكية ممتلكات في العالم الواقعي، يعني ممكن تمتلك NFT يمثّل قيمة 50% من عقار أو شركة.
طيب ليه بنستخدم ال NFT ما أنا ممكن أعمل عقد عادي، نرجع تاني لفكرة اعتماد ال NFT على تقنية ال Blockchain الصعب اختراقها و بالتالي ال NFT بيكون مضمون أكثر لضمان حقوق المالك و لتوضيح كل المعاملات اللي هتحصل على الملكية.

ايه التقنية المعتمدة عليها الNFT

ال NFT معتمدة على ال Ethereum ايثريوم و هي عملة مشفرة تم تداولها من 2015 و تعتمد على نفس التقنية المستخدمة في البيتكوين Bitcoin و هي ال BlockChain أو ال Distributed ledger system مع وجود بعض الإختلافات

طيب أعمل ايه عشان أبدأ أبيع أو أشتري NFT
الموضوع بسيط بس محتاج ميزانية سواء هتبيع أو تشتري

1-هتحتاج تعمل محفظة تدعم الإيثريوم Ethereum wallet زي MetaMask Wallet

2-هتشتري ether (عملة رقمية) ممكن ببطاقة الائتمان عادي

3- هتدخل على أي platform لبيع و شراء ال NFTs زي opensea
بس كدة الموضوع بسيط.

لكن أنا عن نفسي لا أنصح بالبيع أو الشراء إلا بهدف التجربة فقط و بمبلغ مستعد لخسارته أما لو عايز تستخدمه كاستثمار فالموضوع محتاج لسة بحث و دراسة طويلة.
هخوفك شوية عشان الموضوع شكله عجبك

فاكرين التويتة اللي اتباعت ب 3 مليون دولار، الراجل اللي اشتراها عرضها للبيع ب 48 مليون دولار لكن في النهاية أعلى عرض سعر وصله كان 280 دولار -أيوة 280 من غير ألف حتى – و طبعا رفض العرض و البيع لم يتم، بس واضح كدة انه خلاص اشترى التروماي 😊

مخاطر و تحديات ال NFTs

اتفقنا ان ال Blockchain صعب اختراقها و آمنة الى حد كبير و لكن زي أي تكنولوجيا جديدة لسة فيها جوانب غير مكتشفة مما يجعل انهيارها غير مستبعد أيضاً ولو ده حصل كل الNFTs هتختفي معاها و عشان كدة لسة فيه جدل كبير على التقنية بجانب مخاوف من استخدامهم في أنشطة غير شرعية لعدم وجود رقابة مركزية عليها و اعتراضات لأنها تعتمد على العملات المشفرة اللي بتستهلك جزء كبير من الطاقة في عمليات فك التشفير و ده غير طبعا موضوع تباين الأسعار و صعوبة تحديد القيمة الفعلية لل NFT زي مثال التويتة اللي ذكرناه سابقاً. و فعلا حصل هبوط مفاجئ للمبيعات و لقيمة الNFTs المتاحة للتداول في شهر يونيو ٢٠٢٢ و ربما ينذر بانتهاء مبكر لعصر ال NFTs.

مستقبل ال NFTs

من المتوقع استخدام ال NFTs في تطبيقات أخرى بجانب استخدامها كأصول رقمية، و من أهم الاستخدامات انها هتكون كبديل لشهادات الضمان و الجودة للمنتجات الأصلية لضمان عدم نسخها و تقليدها، يعني لو هتشتري ساعة أصلية بيكون معاها NFT الخاص بيها عليه كل بياناتها و هنا اللي بيبيع ساعة تقليد مش هيعرف ينسخ ال NFT نهائي.

ممكن شرح أكثر لتقنية ال Blockchain عشان أفهم أكثر ؟ يعني ايه Blockchain

هنشرح تقنية الblockchain بشكل مبسط في مقال منفصل
و لكن دلوقتي يكفيك تعرف انها عبارة عن كود برمجي programming code بيشتغل كحافظ للسجلات والبيانات و المعاملات في شكل كتل Blocks و كل معاملة أو مجموعة معاملات بيتم وضعها في Block جديد لتكوين سلسة متصلة chain المميز في السلسلة دي إن وضع أي Block جديد بيعتمد على التشفير Cryptography بعمليات حسابية معقدة و يستحيل إزالة أي Block من السلسلة بعد اضافتها , و كل block مرتبطة باللي قبلها و اللي بعدها و بالتالي أي بيانات أو معاملات مسجلة في الBlockchain بتكون حقيقية و مضمونة و صعب جدا التلاعب فيها، عشان كدة لما بنحط بيانات مالكي ال NFT مثلا في ال Blockchain صعب جدا حد يغيرها أو يتلاعب فيها إلا لو باعها و تم إضافة block جديد فيها بيانات المالك الجديد.