Maslow’s Hierarchy | كحك ب 6000 جنيه !! مستغرب ليه ؟؟

?كحك ب 6000 جنيه !! مستغرب ليه ؟؟

انتشر في اليومين اللي فاتوا كحك من محل Le Carnval و سعر العلبة 5000 و 6000 جنيه، و الناس كانت مستغربة جداً، بس أنا مش عارف ايه سبب الاستغراب بصراحة، تعالوا نشوف الموضوع كدة واحدة واحدة بلغة ال Business و العلم و الواقع .
أول حاجة لازم نتفق على حاجتين، 95% من الناس مش هتشتري الكحك ده و أنا منهم و حضرتك اللي بتقرأ أو بتقرأي برضه على الأغلب عمرك ما هتشتريه، و بنعتبر اللي بيشتريه ده انسان غير مسئول و ان ده بذخ زائد.

?المفاجأة ان احنا بنعمل نفس التصرفات الغير مسئولة دي و بنعتبرها عادية و ليها سببها و في ناس تانية بتعتبرها غير مسئولة و بذخ، يعني لما تروح تشتري قميص مثلا من Us Polo ب 2000 جنيه و انت عارف ان نفس القميص اللي بيقضي نفس الغرض -موجود ب 70 و 100 جنيه و نفس الخامات بالظبط، أو شنطة بناتي Brand ب ٤٠٠٠ جنيه موجود نفس خامتها ب ٢٠٠ جنيه، و في ناس بتبصلك على انك غير مسئول، لما تجيب موبايل أيفون ب 30 ألف جنيه و فيه زيه بالظبط نفس الامكانيات ب 7 الاف جنيه.
دلوقتي انت أكيد معترض على كلمة انه زيه، يعني لو قعدنا نتناقش مع بعض للصبح ماشي اكيد فيه فرق لكن لن يبرر أبداً فرق السعر الأضعاف دي.
المبرر الوحيد هو انك بتشتري Brand و سيبك من الامثلة دي لو مش مقنعة و نخلينا في ستائر سيدار اللي ب ٢٠ الف جنيه ٤ أو ٥ متر.

?طيب ليه احنا بنشتري اللBrands دي و ليه في ناس هتشتري الكحك ده عادي ؟
.
تعالوا نشوف الموضوع من الأول
أي قرار شراء في الدنيا بيكون محفزه الأساسي هوالاحتياج -Need لشئ معين
ودكتور علم النفس Abraham Maslow حدد الاحتياجات الأساسية دي من سنة 1943 في Framework سماه هرم ماسلو للاحتياجات

?️Maslow’s Hierarchy of needs?️

و هو بيقسم الاحتياجات الأساسية لخمس أقسام

1-Physiological Needs/ Basic Needs

الحاجات الأساسية للبقاء – الأكل و الشرب

2–Safety Needs

الحاجة للأمان – العمل لتوفير الطعام -المسكن – الملابس للحماية من البرد

3-Social Needs/ Need for Belonging

الحاجة للعلاقات الاجتماعية و الأصدقاء

4-Self esteem needs

الحاجة للثقة بالنفس و ال Recognition – زي الترقي في العمل وأيضا بيدخل فيها ال Ego و البرستيج.

5-Self Actualization Needs

في اختلاف شوية على المرحلة دي في اللي بيعتبرها مكملة لمرحلة ال Ego و تقدير الذات بشكل أكبر
و لكن المقصود بيها بشكل عام هو الوصول لل Full potential و ال Creativity

?️دلوقتي لما بنشتري Brand غالي مش بنشتريه عشان يشبع الاحتياج الأساسي بس، غالبا بيبقى فيه جزء لإشباع ال Self Actualization و ال Self esteem و ال need of belonging
يعني بجيب موبايل أو لبس ماركة معينة عشان صحابي و معارفي جايبين زيه أو عشان أبقى أحسن من صحابي و معارفي أو عشان أشبع ال Ego بتاعي ، و مالهاش دعوة بقى أنا معايا فلوس لده و ده مستوايا الحقيقي و لا لأ، بتلاقي واحد بيتسلف و ياخد قروض عشان يجيب لبس أو موبايل معين، و أروح مطاعم غالية جدا عشان أتصور و أنزلها و هاشتاج #Insta_Sushi
و برضه بتختلف حسب الميول و الاهتمامات الشخصية، واحد بيصرف كثير في الأكل و احد في اللبس و احد في الالكترونيات و الألعاب و هكذا.

?و من هنا نقدر دلوقتي نقول ان نفس الفكرة في الكحك بقى، الموضوع مالوش علاقة بمنتج الكحك نفسه، اللي هيروح يشتري هيشتريه عشان اشباع ال Self Actualization اللي عنده أو عشان ال Image اللي بيوفرها ليه المنتج ده، واحد رايح يخطب في العيد و يدخل على العروسة و عائلتها بالكحك ده عشان يوافقوا علطول :)، رايح زيارة لزميل أو معرفة و عايز يظهر بشكل معين، أو حتى يجيبها في البيت،أي سبب بس أكيد مش هيجيبها عشان طعم الكحك المميز.
.
و عندك أمثلة كثير لبراندات كثير بتشتغل على ال Niche Market ده ،زي شوكلاتة Patchi نفس الفكرة بالظبط أقل علبة شوكلاته ب 3000 جنيه، و زي ستائر سيدار، الستارة ب 20 ألف جنيه 4 متر مثلاً و كان في مثال اتكلمنا عليه قبل كدة لقهوة بشرائح الذهب في الامارات، اللينك في التعليقات.
.
?️مشكلتي بقى الوحيدة يمكن هي مش ان في كحك ب 6000 جنيه، هي هل Le Carnaval كبراند ليه ال Image دي هو معروف انه علطول عامل Premium Pricing بس هل للدرجة دي؟ و المنتج نفسه(الكحك) هل فيه أي اضافة مبتكرة أو الPackaging بتاعه مميز شوية لتبرير السعر جزئيا، زي صينية فاخرة أو وعاء كريستال أو أي حاجة كدة برضة تضفي بعض الأناقة أكثر.
و انا اتوقع ان عنده اسعار اقل من كدة بكتير و حاطط بس دول ك Decoy Marketing Technique ، يعني كطُعم، دلوقتي لو رحت Le Carnval و لقيت علبة كحك ب ٩٠٠ جنيه هشتريها علطول عشان هاعتبرها لقطة.

✔شارك معانا ايه أكثر حاجة بتصرف فيها فلوسك و الناس بتعتبرها بذخ ؟