🍡تجربة المارشميلو The Marshmallow Experiment
انتبه ..لا تأكل هذا المارشميلو
نجاحك يعتمد على صفة مهمة جداً لازم تكون عندك !يا ترى هي ايه ؟ تعالوا نشوف التجربة المهمة دي الأول.
تجربة المارشميلو The Marshmellow Experiment 
في الستينيات في جامعة ستانفورد قام البروفيسور “والتر ميشيل” و فريق من الباحثين بعمل هذه التجربة النفسية البسيطة على مئات الأطفال من عمر ٤ ل ٥ سنوات. التجربة بتبدأ إن الطفل بيدخل غرفة صغيرة مع الباحث و بيقعد على كرسي و أمامه طاولة عليها قطعة حلوى مارشميلو، الباحث بيعمل اتفاق مع الطفل انه هيسيبه شوية ويرجع تاني، و لو لقاه ما أكلش المارشميلو هيديله واحدة تانية مكافأة لكن لو أكلها خلاص مفيش مكافأة تانية.طبعاً بمجرد خروج الباحث بنلاقي الأطفال في صراع ما بين إنه يأكلها دلوقتي أو يستنى شوية و يأخد اثنين.معظم الأطفال أكلوها علطول و فيه أطفال انتظرت شوية، لكن قليل منهم اللي قدر يستنى المدة كلها و هي ١٥ دقيقة و استلم المكافأة.
التجربة كان هدفها دراسة قدرة الأطفال على ضبط النفس و تأخير المتعة Delayed Gratification و تم نشرها عام ١٩٧٢ .
طيب لحد هنا و الموضوع عادي، اللي مش عادي إن الباحثين فضلوامتابعين الأطفال اللي اشتركوا في التجربة لمدة سنين بعد التجربة لتقييمهم من عدة جوانب و هنا كانت المفاجأة :
الأطفال اللي قدروا ينتظروا و كان عندهم ضبط نفس عالي كانوا ناجحين في دراستهم جداً و ناجحين رياضيا و عندهم تواصل اجتماعي أكثر و بعيدين عن الإدمان و كمان أكثر صحة و لا يعانون من السمنة. في حين ان الأطفال الي ما قدروش يستنوا كانوا أقل نجاحاً بشكل ملحوظ جداً.المميز ان تم متابعة بعض الأطفال لحد ٤٠ سنة ووجدوا نفس النتائج على كل الجوانب تقريبا في الحياة و العمل الدراسة و الصحة : الأكثر ضبطا للنفس هم الاكثر نجاحاً .الإستنتاجات
الدراسة دي أكدت بشكل كبير جداً على إن واحد من أهم عوامل النجاح في الحياة هي القدرة على ضبط النفس و الإلتزام و تأخير الاستمتاع رغم الإغراءات.
و فعلا الموضوع واضح في عدة أمثلة :
لو قدرت تضبط نفسك و تسيب الموبايل و الخروج عشان تلتزم و تذاكر ده هيخليك تنجح في دراستك.لو قدرت تضبط نفسك و تصحى بدري و تلتزم بمواعيد شغلك و باللي مطلوب منك هتنجح اكثر في الشغل.لو قدرت تظبط نفسك و ما تتشربش بيبسي و تأكل حلويات كتير و تلتزم بأكل صحي أكتر و تلعب رياضة وزنك مش هيزيد و صحتك هتكون أفضل.لو قدرت تلتزم بجودة عالية و تبني في ال Brand بتاعك صح و تصرف عليه تسويق صح و ترضي عملاءك بدون التركيز على المكاسب السريعة فقط و النظر للمكافأة البعيدة، هتبني براند قوي مختلف عن المنافسين.و أخيراً أهم حاجة في كل ده، لو قدرت تلتزم و تضبط نفسك و تلتزم في الصلاة و الصيام و الزكاة و التعامل و الأخلاق الحسنة هتأخد المكافأة الكبيرة في الآخر .
حاجة أخيرة، في دراسة تانية لمحاولة معرفة ايه اللي ممكن يؤثر على القدرة على ظبط النفس سلباً أو إيجاباً، وجدوا ان أهم حاجة بتؤثر هي الثقة في الحصول على المكافأة المتأخرة من عدمه، يعني لو الشخص تأكد ان المكافأة أكيد جاية حتى لو متأخر ده بيحسن جدا من ضبط النفس، لكن لو ما عندوش ثقة بيؤثر سلبيا على ضبط النفس، يعني كمثال لو انت مش واثق انك لما تلتزم في الشغل هتتكافئ و تترقى حتى لو بعد فترة يبقى مش هتلتزم.️طيب لو عندك مشكلة في ضبط النفس عموماً تعمل ايه ؟
ضبط النفس زي العضلة كل ما تمرّنها تبقى أقوى، ابدأ بالتطبيق في حاجات صغيرة و مع الاستمرارية هتلاقي الموضوع بيتحسن مع الوقت.
احكيلنا أي تجربة ناجحة ليك مع ضبط النفس و الأهم المكافأة اللي في الآخر 
.
