معنى Imposter Syndrome – متلازمة المحتال
70% من الناس يعانون من ظاهرة المحتال .. هل أنت منهم ؟
الناس شايفاك ناجح و ذكي، بس إنت شايف عكس كدة ؟
انت مش لوحدك .. 70% من الناس حالهم نفس الشعور في فترة من حياتهم.
اللي انت حاسس بيه ده اسمه ظاهرة المحتال Impostor syndrome
يعني ايه Impostor syndrome – متلازمة المحتال ؟
متلازمة المحتال : ظهر المصطلح لأول مرة عام 1987 بعد دراسة بحثية لإثنين من الدكاترة الجامعيين
و عرفوا المتلازمة بأنها نمط نفسي و ظاهرة نفسية و فيها يشك الإنسان في إنجازاته وبيكون عنده خوف داخلي دائم من أن يعتبره الآخرون «محتالًا».
على الرغم من وجود أدلة خارجية على كفاءتهم، يبقى الأفراد الذين يعانون من هذه الظاهرة مقتنعين أنهم محتالون، وأنهم لا يستحقون كل ما حققوه. و أن نجاحهم نتيجة للحظ، أو أنه نتيجة تضليل الآخرين نحو الاعتقاد بأنهم أكثر ذكاءً مما يعتبرون أنفسهم عليه.
و بالتالي يعتبروا أنفسهم غير ناجحين من الأساس.
الدراسات في البداية و جدت شيوع المتلازمة بين السيدات ذوات الإنجازات الكبيرة أكثر من الرجال، و لكن الدراسات الأحدث أكدت إنها تؤثر على الرجال والسيدات بنفس الدرجة تقريبا
بعد أبحاث كثيرة، تم تحديد 5 أنواع من الشخصيات بتكون أكثر عرضة لهذه الظاهرة :
The Perfectionist الكمالي
مش محتاجة شرح، الشخصية دي دائما بتحط أهداف عالية جدا لنفسها، و بتتأثر بأي نقد و لو بسيط جدا، بتسعى للكمال و بتهتم التفاصيل، بتحب التحكَّم و عندهم دائما إحساس أن الحاجة عشان تتعمل صح لازم يعملوها بنفسهم
(الشخص ده بسهولة جدا لو شخص واحد انتقد شغله وسط عشرات المشجعين،يحس إنه فعلا مش ناجح و إن المشجعين دول بيجاملوه، لإنه دائما بيحس إن فيه أحسن )
The Superwoman/man الرجل الخارق – المرأة الخارقة
النوع ده نقدر نقول عليه مهووس بالعمل، اللي بيقعد وقت إضافي كثير في الشغل، بيهمل حياته الشخصية شوية و يهمل هواياته عشان يؤدي أفضل في الشغل
(هنا رغم انه بيكون إنسان ناجح فعلا و متفوق في شغله و ممكن يكون بيحبه فعلا، بس الشغل الإضافي الكثير ده أحيانا كثير بيكون بسبب إنه حاسس إنه مايستحقش مكانه ده و إن زملاؤه أفضل منه، فبيحاول يعوّض الاحساس ده بالشغل أكثر)
The Natural Genius العبقري
أنا بعتبر ده أصعب نوع، هو قريب للشخص الكمالي، بس أصعب منه شوية، لإن الشخص ده مش بس بيسعى للكمال في كل حاجة يعملها، لأ ده لازم يعملها متقنة و بسرعة كمان بدون وقت و مجهود كبير عشان يكون عبقري.
يعني بيفترض إن لازم أي حاجة يعملها أو يدريها يكون مميز فيها جدا و يتقنها بسهولة و إلا يكون فاشل.
(مثال للنوع ده: الشخص اللي لازم التقييم بتاعه يكون أعلى تقييم سنوي في الشركة كلها،و في الدراسة لازم يبقى أعلى الدرجات دائما في كل المواد و لو ده ما حصلش بيحس بالفشل.
The Soloist المنفرد
هنا الشخص بيرفض أي مساعدة في أي مهمة توكل إليه، عشان بيفترض إن المساعدة دي معناها إنه مش هيقدر يقوم بالمهمة لوحده و الناس هتعتبره فاشل.
(مثال المدير اللي بيقوم بمهمات كثيرة بنفسه بدون الإعتماد على المرؤوسين لديه مع إنها مش من مهامه الأساسية،بس عشان يحس إن صعب استبداله )
The Expert الخبير
الخبير بيقيس امكانياته بمقدار المعرفة اللي عنده، و بيحس دائما إن ناقصه معلومات كثيرة ومحتاج يعرف و يتعلم أكثر
(مثال: لشخص بيتعلم كل حاجة بتيجي قدامه و في كل المجالات لازم يعرف عنها كل التفاصيل عشان دائما عنده إحساس إن كدة ناقصه معرفة أو خبرة)
و هنا لازم نفرق من الإحساس الطبيعي للرغبة في التعلَم و التطور كشئ مهم و أساسي، و ما بين الهوس في المعرفة لتعويض الإحساس الداخلي إني مش فاهم كفاية و مش كويس كفاية
بصراحة الظاهرة دي مهمة جدا جدا في وجهة نظري و لازم كل واحد يحاول يتأكد إنه هو أو حد من أبناؤه ظهر عليهم أعراض منها .
ليه بقى ؟
لإن الظاهرة دي أولا :بتحدث لناس ناجحة فعلا و عندها إمكانيات و قدرات عالية و لكن بسبب الظاهرة دي بيبقى عندهم ضغط نفسي كبير جدا بيؤثر على حياتهم الشخصية و العملية، بالإضافة إنه بيعيقهم عن النجاحات المستقبلية لخوفهم من الفشل أو عدم ثقتهم في نفسهم و إمكانياتهم.
ثانياً : لأنها ظاهرة منتشرة جدا و حسب الدراسات : 70% من الأفراد سيعانون من أعراض وعلامات ظاهرة المحتال لمرة في حياتهم على أقل تقدير و تم تصنيفها كاضطراب نفسي مش مجرد ظاهرة نفسية.
ثالثا : لإن برضه في إعتقادي الشخصي حلها سهل إلى حد ما و أول الحلول إنك تعرف الظاهرة دي و تعرّف كل اللي حواليك عنها لإن مجرد إن اللي عنده المتلازمة دي و هيقرأ عنها هيبدأ يحس إن الإحساس اللي عنده ده طبيعي وبيجي لمعظم الناس و ده دليل حقيقي إنه ناجح فعلا و يبدأ يتغلّب على مخاوفه بنفسه و يتجنّب الأثار السلبية للمتلازمة لحد ماتختفي تماما و الأهم إنه يمنع من تسهيل ظهور المتلازمة عند أطفاله لإن ملامح ظهور المتلازمة دي بيبدأ من الصغر و أثبتت الدراسات إن من
أهم العوامل:
توقعات العائلة المرتفعة –مقارنة أولادك مع الآخرين – الإفراط في الحماية
أول مراحل تجنب سلبيات المتلازمة هي الاعتراف بها ، لإن في العادي اللي عندهم المتلازمة بيحس إن شعورهم ده محفز للنجاح أكثر و التميّز أكثر، و أنا متفق بس بحدود و ما تسيبش الإحساس ده يسيطر على حياتك كلها.
كام واحد حس إنه مرَ بالمتلازمة دي قبل كدة أو بيمر بيها حالياَ ؟
أنا عن نفسي حاسس إن كل الأنواع الخمسة عندي، بس تحديدا رقم واحد عشان أكثر من مرة سمعتها من عملاء مقربين وبصراحة من قبل ما أقرأ عن المتلازمة و أنا بدأت أتيبه للموضوع وتأثيره السلبي و أحاول أتجنبه، و القراءة عن المتلازمة دي ساعدتني أكثر.
بعد ما تجاوب اعمل الإختبار ده عشان تتأكد أكثر(مقياس كلانس لظاهرة المحتال) :
Clance Impostor Phenomenon Test -اختبار لقياس ظاهرة المحتال
هتجاوب على 20 سؤال و هتظهرلك النتيجة بالشكل ده
الجدير بالذكر إن هذه الظاهرة هي العكس تماما لتأثير دانينغ -كروجر dunning kruger effect و فيها بيكون الشخص قليل الخبرة واثق في نفسه جدا و عنده اقتناع انه خبير و عنده قدرات كبيرة عكس الحقيقة .
