Find the ”Duck” of your Brand- ايه علاقة البطَة بالبراند⁉️

 هنحكي قصة صغيرة كدة عن عميل بيتكلَم عن تجربته في أول اقامة ليه في فندق كونراد و دي ترجمة حرفية لكلامه :
.
” منذ أكثر من خمس سنوات، أقمت لأول مرة في فندق كونراد في هونج كونج، في الغرفة في دورة المياه على حافة حوض الاستحمام وجدت بطة مطاطية صفراء و لها فم أحمر، أنا وقعت في حب الفكرة و (في حب البطة) في الحال.
لقد أصبحت أكثر شئ أتذكره عن الفندق، و أصبحت نقطة البداية التي تذكرني بكامل تجربتي في الاقامة في الفندق”

الموضوع بهذه البساطة، كل شركة لازم يكون عندها “بطة” للبراند الخاص بيها، الشئ الصغير المميز ده هو اللي هيساعد على اثارة و تحديد و انعاش التجربة المرتبطة بالبراند و تسهيل ارتباطها بالعميل و تذكيره بالتجربة كلها.

طيب كالعادة مش هنأخذ الكلام من الكتب و خلاص: قعدت أفتكر تجاربي الشخصية هل في “بطًة” أثرت فيًا، أول حاجة افتكرتها الفنادق، افتكرت فندق في تركيا رحته من 3 سنين كان مميز فيه جداً رائحة المعطر اللي في كل مكان في الفندق من أول ما تدخله، و المميز انه عطر ليمون مش من الحاجات المنتشرة يعني، بس كان عاجبني جدا و لحد الان فعلا بأفتكر الفندق بالمعطًر ده.
.
حاجة ثانية من 7 سنين مثلا لما كنت بروح توكيل نيسان(السبع)، كان فيه كافيه فوق في الاستراحة و كان المهندس بيدي كل عميل كوبون ب 15 جنيه مشتريات من الكافيه، طبعا المبلغ صغير و انت بتدفع الزيادة برضه، بس بصراحة كانت بتعجبني الحركة جدا و ماكنتش بأتضايق من القعدة في التوكيل خالص بالعكس بأخذ الموضوع كأني رايح كافيه و أخلص شغل هناك أو أعمل مكالمات، عكس بقى باقي التوكيلات اللي اتعاملت معاها مع انها أعلى المفروض و الاستراحات حلوة و كبيرة و مكيفة و كل حاجة بس بأفتقد حركة الضيافة و الكافيه المتميز و يظل السبع أحسن تجربة بشكل عام.
.
أحدث حاجة بقى دي من شهرين و لا حاجة مطعم سوري صغير، من أول ما تروح و المدير و كل العاملين يعاملوك بكل ترحاب و كل دقيقة انتظار يقولك حاجتك قرُبت خلاص، و لو قاعد كثير يجيبلك بطاطس تحية، و الأهم من كل ده بقى الجملة اللي مش بنساها بعد ما تأخذ الطلب خلاص يقولك (بدك أي شي تاني سلطة بطاطس ثومية أي شي (مجاناً) ) الجملة دي بتبسطني جداً بصراحة و بتخليني أروح تاني دائما (مع اني مش بيبقى بدي أي شي ? )
.
أخيراً في شغلي الخاص بالذات لما يتعلق الموضوع بالتعامل المباشر مع عملاء زي الكورسات مثلاً، رغم اقتناعي التام ان القيمة الأساسية هي المحتوى و المادة العلمية و المحاضرين و غيره، بس الموضوع تجربة متكاملة Experience ، فبحاول أحسنها على قد ما أقدر، فالزملاء اللي شغالين معايا بيلاقوني بتدخًل في كل التفاصيل و بأحب أحط لمسات صغيرة كدة و هما يبقوا مستغربين و يقولوا محدش بيعمل كدة أصلا و مش هتلاقي حد منتظر ده، أو محدش هياخذ باله، لكن أنا ببقى بحاول أدوَر على البطة بنت الايه دي ? و بأفرح أوي لما بلاقي حد من العملاء أخذ باله من تفصيلة صغيرة من اللي أنا برًكز عليهم، و طبعاً في حاجات تانية كثير ممكن تتعمل بس ليس كل ما يتمناه المرء يدركه، و في حاجات كثيرة بتبقى Feedback من الزملاء و العملاء و بنعمل كل اللي ينفع يتنفذ لحظيا و الباقي موجود في الخطة دائما مهما كانت تفصيلة صغيرة، و مش محتاج أقول المشكلة بتبقى أكبر لما بأكون في مكان ماليش سيطرة كاملة عليه زي الأكاديمية مثلاً و لا لما بنروح دبي أو اسكندرية، بس بنحاول برضه على قد ما نقدر.

كل اللي فات ده بيندرج تحت ال Experiential Marketing و هو التسويق للمنتج أو الخدمة مش من خلال المواصفات و الفوائد فقط بل من خلال ادخال العميل في تجربة متميزة.
How to get Customers to Sense, Feel, Act, & Relate to your company & Brands.
.
ممكن تقرأ أكثر عن الموضوع من كتابين :
?Experiential Marketing – Bernd H.Schmitt
?Strategic Brand Management- Keven Keller
.
✔️انتوا بقى ايه الأماكن أو الخدمات أو المنتجات اللي افتكرتوها لما قرأتوا الكلام ده، و في شغلكوا عموماً هل حاولتوا تدوًروا على البطَة قبل كدة ؟؟

Marketing Course Cairo

Marketing Course Dubai