وهم المقارنات !!

لو عندك اختيارين :

1- تقبض مرتب 100 ألف جنيه سنويا و كل زملاءك في الشركة هيكونوا أقل منك بحد أقضى 50 ألف سنويا.

2-ولا تقبض مرتب 150 ألف جنيه سنويا و كل زملاءك في الشركة هتكون مرتباتهم أكثر منك 300 ألف جنيه سنويا.

طبعا معظمنا دلوقتي هيقول طبعاً الاختيار الثاني بدون تفكير.

الحقيقة إن في دراسة عملها باحثين في هارفارد وفيها خيروا الناس في التجربة بين اختيارين :
live in a place where they had income of $50,000, but the average person had an income of $25,000
or
one where they have an income of $100,000 in a place where the average income was $200,000 (assuming prices were constant in both examples).
النتيجة كانت 52% من الناس فضلوا الإختيار الأول.
مش بس الدراسة دي، في دراسة تانية عام 1998 درست نفس الموضوع و كانت بعنوان :
Is more always better?: A survey on positional concerns
و توصلت إلى نفس النتيجة تقريبا، نصف الناس مستعدين يأخدوا نصف قيمة الدخل مقابل إنهم يكونوا أعلى في القيمة نسبة لزملائهم والمحيطين بيهم. يعني فضلوا ال Relative Positions على ال Absolute Well being

أنا بصراحة اتفاجئت جدا بالدراسات دي و رغم ان موضوع المقارنة ده شئ طبيعي نسبيا، بس بصراحة ماكنتش متخيل انه مهم جدا عند نسبة كبيرة من الناس بالشكل ده لدرجة انه يوهم نفسه انه هيكون أسعد بالأقل طالما هيكون أحسن من اللي حواليه و هيكون مش مبسوط بالأكثر طالما اللي حواليه أكثر منه.

و طبعا الموضوع ده بيرجع لفكرة ال Reference point و المقارنة و هي من أهم النقاط اللي بيتم بحثها أثناء دراسة السلوك الإقتصادي للأفراد behavioral economics و هو ان الإنسان دائما بيحط نقطة محددة كمرجع عشان يقارن بيها سواء النقطة دي كانت مقارنة بالغير زي المثال ده أو سعر منتج معين زي فكرة ال Decoy Marketing اللي اتكلمنا عليها قبل كدة

بغض النظر عن عن احنا لازم نقلل موضوع المقارنات ده بس في الآخر هو طبيعة بشرية و هيفضل موجود و مؤثر،
ولذلك الموضوع ده لازم يفهمه كويس كل المسئولين عن التوظيف و المرتبات كأصحاب الشركات أو مسئولي الموارد البشرية و يعرفوا ان العدل في المرتبات مهم جدا و أساسي لإن حتى لو المرتبات عالية بس مفيش عدل في طريقة تحديدها ده هيؤثر جدا على رضاء الموظفين.

و أخيرا الرضا و القناعة كنز لا يفنى فعلا، و ياريت نحاول نبقى من ال 50% اللي مش بيقارنوا نفسهم بغيرهم و نركز مع نفسنا و نجتهد و نرضى في نفس الوقت.

حاجة بقى للترفيه : السلوك ده نفسه موجود في الحيوان كمان و دي تجربة لنفس الموضوع اتعمل مع قردين، قرد كان راضي و مبسوط جدا لما بيأخد قطعة خيار كمكافأة ليه على لعبة معينة بيعملها، و لما جابوا جنبه قرد تاني بيأخد عنب كمكافأة ، اتضايق و بقى يرمي الخيار و متعصب جدا عشان عايز عنب زي زميله.