Marketing Case Study-Bigcola

النهاردة هنتكلم عن شوية مفاهيم تسويقية كدة في شكل عملي و هنطبقها على الخطة التسويقية اللي اتبعتها شركة بيج كولا في مصر و ازاي كان رد فعل بيبسي و كوكاكولا على دخول بيج كولا السوق المصري .
————————–—————
◕ Big Cola Marketing Strategy
أول حاجة بيج كولا دي بتنتجها شركة اسبانية كبيرة اسمها
AJEgroup
متخصصة في المشروبات بصفة عامة و من أهم البراندات بتاعتها Big Cola
طبعا هي شركة
Multinational
بس تأسست في بيرو في التمانينات لكن طبعا انتشرت في العالم كله او 22 دولة بشكل ادق و بتكبر بشكل كويس جدا لدرجة ان مشروباتها من اكتر 10 منتجات مبيعا في امريكا الجنوبية كلها و بتناطح بيبسي و كوكاكولا في بلاد كتيرة جدا زي الهند و كمان واخدة السوق منهم في بعض البلاد زي نيجريا مثلا و رؤية الشركة انها تكون من اكبر 20 شركة في العالم بحلول عام 2020
طيب ايه اللي دخلها مصر و ايه الاستراتيجية التسويقية بتاعتها عامة و هنتكلم هنا تحديدا على
Big Cola
اولا المنافسة في سوق المشروبات الغازية عموما نقدر نوصفها ب
Duopoly
يعني فيه شركتين كبار مسيطرين على السوق كله . و عامة المنافسة في الاسواق ممكن تبقى برضه
Oligopoly
عدد قليل من الشركات مسيطرين على السوق زي فودافون و موبينيل و اتصالات كدة .
Monopoly
يعني شركة واحدة اللي محتكرة السوق كله و جه بقى نادر جدا الا في حالة بعض الخدمات اللي مسيطرة عليها الحكومة بس ..وزي مثلا المصرية للاتصالات في مصر محتكرة سوق الاتصالات الارضية .
Monopolistic Competition
و ده أشهر نوع و بيكون السوق ده فيه شركات كبيرة كتير بس مفيش ولا واحدة قادرة تسيطر على السوق فبتحاول تميز نفسها و تسيطر على جزء معين من السوق ..زي سوق العربيات و الموبايلات كدة .
———
ما علينا نرجع لكلامنا ..ده معناه ان المنافسة صعبة جدا لانك بتنافس شركتين كبار جدا و ممكن يتعاونوا كمان عشان يطلعوك برة السوق خالص و ده حصل كتيير (وحصل في مصر مع RC كولا )
طيب انا اقدر اميز نفسي اواي و انافس مع شركتين كبار ليهم محبينهم ومستهلكينهم .

لو قعدت اقول انا احسن طعم مش هينفع ..طب انا كواليتي احسن مش نافع طيب ايه الحل ..الحل في السعر ..اني ادخل بسعر اقل من غير ما اتنازل عن الكواليتي في كل حاجة حتى التسويق و الدعاية و شكلها بحيث يشتريني اللي هيفرق معاه فرق السعر البسيط ده و مع الوقت اخلي عنده ولاء ليا بحيث يفضل يشتريني انا علطول و كمان ينشر اسم البراند بتاعي و يحس انه مش بس بيشتريني عشان فرق السعر .
يعني من الاخر
◕ Cost Leadership Strategy
بس برضه عايز اعمل
Good Brand Identity & Brand Loyalty to increase customer lifetime value and create good word of mouth and buzz
—-
و عشان كدة عاملين شراكة اقليمية مع نادي برشلونة الاسباني في بعض المناطق و منهم مصر عشان يحسسك انه برضه براند جامد و عالمي و عشان كدة ناس كتير بتفتكر ان الشركة اسبانية لان صفحتهم على الفيسبوك كلها كلام عن برشلونة .
طيب عمل ايه في مصر باختصار ..
احنا قولنا الاستراتيجية الاساسية هيا السعر المنافس فنزلت بسعر اتنين جنيه و نص للزجاجة العادية 360 مل …و ده ارخص من اي زجاجة تانية لبيبسي و كوكاكولا او على الاقل العبوات المتداولة و منتشرة فهنا انا مستهدف الشريحة اللي مالهاش ولاء اوي لبيبسي او كوكاكولا و اصلا دايما بيشتروا اللي عليه عرض فيهم فممكن نص جنيه فرق تحولهم
و دول اسمهم
Switchers
او الشريحة اللي اصلا النص جنيه يفرق معاهم جدا زي مثلا الطلبة او الشباب الصغير عامة و الشريحة ذات الدخل المنخفض .. و هنا انا بفتكر زمان و هيفهمني مواليد التمانينات لما كانت البيبسي الازاز بتزيد عشرة صاغ او لما البيبسي الصاروخ اتعملت ب 60 قرش بعدين خمسة و سبعين كان الموضوع ده مأثر في ميزانيتنا كطلبة قد ايه ..و انا بكلمك في مناطق راقية و مستوى كويس جدا بس برضه مؤثرة جدا … فالخمسين قرش دلوقتي تقريبا نفس فرق ال10 صاغ من 15 سنة تقريبا ..
المهم انها ضامنة شريحة كبيرة من الناس هتشتري المنتج مع حملة دعائية كويسة في التلفزيون و الشوارع و السوشيال ميديا .
طيب نلخص المزيج التسويقي بتاع بيج كولا في مصر بسرعة او ال
4Ps Strategy
————————–———
◕ Big Cola Marketing Mix :
1-Product
مافيهوش فن اوي عادي بيبسي عادي طعمه كويس و نازلين ب 3 انواع زي المنافسين و حجم عادي و البراند اسمه كويس و مستغل حلو )فكر على كبير) و عاملين طعم اناناس على ما اعتقد بس التركيز مش عليه خالص ..و فيه حجم 500 مل و ده مركزين عليه شوية انه اكبر من المنافسين و بسعر اقل بس انا اعتقد ان الانجح هيا ال 360 مل الصغيرة .
——————-
2-Price
الميزة التنافسية الاساسية
اسعاربيج كولا هى ال 360 مل ب 2.5 جنيه وال 500 مل ب 3 جنيه و ال 1.5 لتر ب 5.5 جنيه
و الاستراتيجية التسعيرية بتاعتهم
Market Penetration Pricing
و فيها بقدم سعر منافس مع منتج بكواليتي عالية برضه .
و دي غير استراتيجية سينا كولا اللي تعتبر
Economic Pricing
و فيها بقدم سعر قليل اه بس برضه المنتج و البراند بتوعي كواليتي اقل .
———————–
3-Place
و هنا بقى يبان الفرق في قوة شركتي بيبسي و كوكاكولا ..لان رغم ان المنتجات الاستهلاكية دي التوزيع فيها لازم يبقى مكثف
Intensive Distribution
الا ان بيج كولا اختارت انها تبدأ بتوزيع اقل كثافة او
Selective distribution
يعني موجودة في اماكن معينة و انت لو سألتهم دلوقتي على صفحتهم الاقيها فين بدل ما يقولك في كل حتة و ده المفروض عشان تنافس بقوة هتلاقيه بيقولك في فروع كازيون و كارفور ..بس مفيش ماتع انك تلاقيها في اماكن تانية بس متفرقة و ده برضه صح مش غلط و دي طريقتهم عامة في العالم حتى المحلليين بيقولوا
Big Cola Penetrates markets slowly but in steady manner
يعني اتمسكن لحد ما تتمكن 🙂 و ناجحين في كدة .
. و الجدير بالذكر هنا ان سينا كولا ناجحة في ده جدا انها تقريبا مسيطرة على الصعيد و مش بتوزع غير هناك لان دي الشريحة المستهدفة بتاعتهم بس الفرق ان سينا كولا حصرت نفسها في الشريحة دي .
————————–—————–
4-Promotion
ليه بيج كولا مش سينا كولا بقى …لأنها اه دلوقتي مستهدفة شريحة معينة بس بتبص لقدام و قدام اوي كمان فبتبني براند قوي
– ◕ Advertising
عملت حملة جيدة جدا من حيث الانتشار و التعريف باسم المنتج سواء في الميديا او في الشوارع .
Create Brand awareness
.
◕ Sales Promotion
عاملة عروض كويسة و اهمها انها فضلت فترة توزع بيج كولا ببلاش في المولات الكبيرة
Initiate trial
و ده من اهم خطوات الشراء و هي الخطوة اللي قبل الشراء علطول ..طالما جربت و عجبك هتشتري .و مسابقات بجوايز كويسة و اغلبها السفر لمشاهدة برشلونة.
.
◕ Public relations-PR
Sponsorship
عملت شراكة اقليمية مع واحد من اكبر نوادي العالم و ده بيدي ثقة كبيرة في المنتج
Credibility
على مستوى مصر بتنزل الجامعات(عشان الشباب) و تعمل مسابقات و عروض هناك بجانب المولات .
.
◕ Online Marketing
تواجد ممتاز على السوشيال ميديا و خصوصا الفيسبوك و تفاعل مع المعجبين و مسابقات و الصفحة 5 مليون .
————————–

◕ طيب ليه بيبسي و كوكاكولا المفروض ياخدوا بالهم لان ده منافس قوي و عايز يناطحهم في مصر و العالم و نجح في بعض البلاد كمان. مش زي سينا كولا المنتج المحلي واخد جنب و خلاص ,
و انا شفت ان كوكاكولا معملتش اي رد فعل واضح لكن اكيد في ردود فعل في الكواليس .
لكن بيبسي كان واضح اوي رد الفعل في الزجاجة الجديدة اللي نزلتها بنفس سعر بيج كولا و هي (الفرود( و كمان عملتلها حملة دعاية ..للفراودة فقط ..مع ان بيبسي في الحقيقة ما نزلتش السعر نهائي هي بس نزلت ازازة اصغر من بيج كولا اللي بس بنفس نفس السعر القليل ..
لسببين عشان ماينفعش اقلل من سعر منتجي فاجأة كدة و خصوصا لو براند كبير و السبب التاني انها عارفة و متأكدة ان اللي هيشتري بيج كولا هيشتريها عشان النص جنيه الاقل مش عشان فرق ال 100 مل الزيادة لان المنتجات الاستهلاكية دي بنسميها
Low involvement products
يعني المستهلك مش هيقعد يفكر كتير اوي قبل ما يشتري و يقارن الحجم بالظبط و المل واقف بكام و الكلام ده ..هو بس ممكن لما يلاقي قدامه بيبسي ب 3 جنيه و نوع بيبسي جديد ب 2 و نص يروح يشتري الارخص .او يقول اجربه .. لكن لما يلاقي قدامه الاتنين بنفس السعر هيشتري اللي عارفه على الارجح .
variety seeking buying behavior

شكرا ليكم و طبعا افكركم ان التحليل ده غرضه الاساسي ربط مفاهيم التسويق النظرية بالواقع العملي مش اكتر زي الحالات العملية اللي بنستخدمها في الكورسات و بشاركها معاكم من باب تبادل الاراء والخبرات . لكن التحليل الدقيق المتكامل لازم يستند على المعلومات الدقيقة و الكاملة للسوق و المنافسين .
شكرا ليكم

2 thoughts on “Marketing Case Study-Bigcola

  • January 7, 2017 at 7:38 am
    Permalink

    جزاك الله خيرا ياريت امثله عمليه زي كدا اكترر و اكتر

    Reply

Leave a Reply

Your email address will not be published. Required fields are marked *